Jón Örvar Forseti Hagsmunaráðs MA 2004-5

2004-05-25T21:06:00.000-07:00

Nýkjörinn Forseti Hagsmunaráðs, Gubbill Lumör-Hakkelströff II (til vinstri) og fjölmiðlafulltrúi hans, Satan (til hægri), á blaðamannafundi í morgun, þar sem þeir harðneituðu flissandi öllum ásökunum um kosningasvindl.

Í stefnuræðu sinni sagðist Gubbill ætla að beita völdum sínum í þágu hins illa.
"Ég verð ekki þjónn hins slefandi lýðs - heldur drottnari almúgans!"

Umbótastefna Gubbills er umdeild, sérstaklega hvað varðar ákvæðið um Nýju-vikuna sem hljómar svo: "Engar helgar. Nýja-vikan verður: vinnudagur, erfiðisdagur, dagur tvöfaldra afkasta og svo aftur vinnudagur, erfiðisdagur...Þannig verða allir bara glaðir þegar vinnudagur kemur eftir degi tvöfaldra afkasta!"

2004-04-14T20:34:00.001-07:00

Kosningapistill Jóns Örvars Gestssonar, frambjóðanda til forseta Hagsmunaráðs

Komdu sæll kjósandi góður. Eins og þú kannski veist verða kosningar til skólafélagsins haldnar næsta föstudag, og eins og þú hefur vonandi séð í öllum áróðrinum þá hef ég ákveðið að bjóða mig fram til embættis forseta Hagsmunaráðs. Það lætur ef til vill ekki mikið yfir sér, þetta Hagsmunaráð, enda stendur það ekki fyrir neinum böllum eða uppákomum, en það er samt mjög mikilvægt fyrir okkur, því það er samstarfsgrundvöllur nemenda og skólans og yfirvalda hans. Á vettvangi Hagsmunaráðs fá kjörnir fulltrúar okkar nemenda að taka þátt í ákvarðanatöku og samráði um stjórn og stefnu í MA, sem er ekki lítið hagsmunamál fyrir okkur. Ef þið eruð enn að velta fyrir ykkur mikilvægi þessa embættis má minnast þess að stúdentaóeirðirnar og þjóðfélagsbreytingarnar í kjölfarið sem kenndar eru við 68 kynslóðina snerust í upphafi að töluverðu leyti um rétt stúdenta til að hafa eitthvað að segja um sín mál innan skólans.
Ég hef í hyggju að halda uppi dyggri hagsmunagæslu fyrir hönd nemenda nái ég kjöri í þessum kosningum. Ef við hlúum ekki að réttindum okkar og berjumst ekki fyrir hagsmunum okkar gerir það enginn fyrir okkur. Hagsmunaráð er tækið til að koma þessu í verk, enda situr forseti þess í skólaráði. Hugsið t.d. um það næst þegar mætingin er slök hjá ykkur að einn samnemenda ykkar fær svolitlu um það ráðið hvort þið fallið á mætingu. Það skiptir máli hver er forseti Hagsmunaráðs og ég ætla svo sannarlega ekki að bregðast ykkur.

2004-04-14T20:34:00.000-07:00

Blaðafulltrúi Jóns Örvars leiðir fjöldasöng

London, Washington DC Reuters, AP Press

FRÉTTAMENN víða að gera sig brátt reiðubúna að koma til skila framboðsræðu Jóns Örvars Grétarssonar sem hann mun flytja með viðhöfn á kosningafundi nemendafélags MA í dag. Ljóst er að ræðan mun verða ein sú mikilvægasta á ferli Jóns og eru menn í samræmi við það farnir að tala um nýja Fjallræðu eða Gettysburg ávarp. Ekki náðist í Jón Örvar sjálfan í gærkvöldi, en tengslafulltrúar hans létu hafa eftir sér að hann myndi "ekki gefa endasprettinn eftir frekar en fyrri daginn."

2004-04-06T18:41:00.000-07:00

Sjarmörinn guðhræddi, Mel Gibson, hefur nú tilkynnt að næsta verkefni hans verði þriggja klukkustunda epísk stórmynd byggð á forsetakjöri Jóns Örvars til Hagsmunaráðs. Í viðtali sínu við okkur í gærkvöld sagði hann að Kristsmyndin hefði í raun aðeins verið upphitun fyrir
"The Flaming Hot Passion of the Jón Örvar".

"Það var hann Jónsi sem uppgötvaði mig - án hans væri ég vafalaust enn að vinna við að moka flór á kengúrubýlinu hans frænda míns, Jeff Gibson!" segir Melurinn og skellir upp úr þegar hann rifjar upp fyrir okkur nokkrar smellnar kengúrusögur. "Jónsi hjálpaði mér mikið með handritið að Braveheart. Upphaflega var Braveheart afgreiðslumaður í raftækjaverslun, en það var hann Jónsi sem stakk upp á gera hann að frelsishetju Skota. Hann kenndi mér meira að segja skoskan framburð og nú ætlar hann að kenna mér að tala með norðlenskum hreim!"

Grunur leikur þó á að ýmsar þær stórmyndir sem eru í bígerð séu aðeins ævisögur Jóns Örvars í dulargervi, t.d. "King Kong" eftir Peter Jackson og "Patch Adams 2" með Robin Williams.

Settu X við Jón Örvar

2004-04-05T13:59:00.000-07:00

Rósir spretta, lóur syngja,
sólin brosir, bjöllur hringja.
Sumar kemur, snjórinn hörfar,
settu þitt X við Jón Örvar.

2004-04-04T14:37:00.000-07:00

Tilraun óþekktra árásarmanna til að ráða Jón Örvar af dögum fór út um þúfur þegar Sérsveit Jóns Örvars tókst að forða leiðtoganum úr kúlnahríð klukkan 18:00 í dag. Ekki er vitað hverjir tilræðismennirnir voru, en öll bönd berast að samtökum herskárra konungssinna. Mikil mildi þykir að enginn hafi særst, en ljóst er að hin umdeilda Ungliðasveit hafi með sanni staðið sig með prýði og var þeim öllum sæmd Fálkaorðan í skyndiathöfn í kvöld auk þess sem allir fengu chupa-chups sleikjó. Héðinn Valdimarsson, leiðtogi Ungliðasveitarinnar, kvaðst hafa séð til höfuðpaurs tilræðismannanna og teiknaði af honum þessa hrollvekjandi mynd.

Settu X við Jón Örvar - sjálft Lýðræðið er í húfi

2004-04-02T10:33:00.000-08:00

Nýju Jón Örvar dúkkurnar seldust upp á innan við klukkutíma í Fjarðarkaupum í dag. Vilhelmína Zöega, afgreiðslukona á kassa tvö, kvaðst ekki hafa upplifað aðra eins örtröð síðan upp komst að páskaegg númer sex höfðu óvart verið verðlögð eins og páskaegg númer fjögur, árið 1987. Dæmi voru um að viðskiptavinir keyptu allt að tíu dúkkur í einu, en ljóst þykir að svartamarkaðsbrask í kringum vörur tengdar framboði Jóns Örvars nemi tugum milljóna.

Ný sending mun berast í allar helstu dótabúðir landsins á morgun og innan tíðar verður hægt að panta þær á þessari síðu. Auk Jónsa-dúkkunnar eru í boði tíkin hans, Þorvaldur - og hin ógurlega óvinadúkka, Svarti Jólasveinninn.

Athugið að einungis er um takmarkað upplag að ræða... fyrstir koma, fyrstir fá!
Settu X við Jón Örvar

2004-04-01T03:19:00.000-08:00

Heimir Guttormsson, einn af mótframbjóðendum Jóns Örvars til forseta Hagsmunaráðs, hefur dregið framboð sitt til baka, eftir að Gallup-könnun sýndi að hann hlyti aðeins um 0,5 % atkvæða. Hann kvaðst vonsvikinn, en hann hafði veðsett hús móðurafa síns til að reka framboðið. " Ég hætti við því ég veit að ég á bara engan sjéns í þetta," sagði Heimir og saug upp í nefið " enda er augljóst að gulldrengurinn tekur þetta." Hann segist alls ekki sjá eftir ákvörðun sinni og hvetur aðra frambjóðendur til að gera hið sama. Hann hugar nú að trúðanámi sínu, sem hann tekur mjög alvarlega, og ætlar að reyna að komast inn í finnska trúðaskólann í sumar.

Settu X við Jón Örvar

2004-04-01T02:58:00.000-08:00

Kári S. Geirmundarson, sem hefur verið blindur frá fæðingu, öðlaðist sýn í gærmorgun þegar hann hlustaði á Jón Örvar, næsta forseta Hagsmunaráðs MA, halda ræðu á kosningafundi. Allmörg vitni urðu að þessum einstæða atburði og eru flestir á einu máli um að kröftug ræða Jóns Örvars hafi á einhvern undraverðan máta framkallað þetta kraftaverk. Óljósar sögusagnir eru um það að annar áhorfandi hafi losnað við langvarandi sveppasýkingu, en það hefur ekki fengist staðfest. Ekki náðist í Jón Örvar vegna málsins.

Settu X við Jón Örvar

2004-04-01T02:22:00.000-08:00

Jón Örvar, næsti forseti Hagsmunaráðs MA, hefur tilkynnt að hann hyggist flytja inn stærsta trampólín sem nokkurn tíma hefur komið til landsins. Viðræður standa nú yfir við United Trampolines.

"Hvers vegna klifra upp metorðastigann, þegar maður getur bara fengið sér trampólín?" var haft eftir Jóni Örvari.

Settu X við Jón Örvar.

2004-03-31T15:26:00.000-08:00

Þessar hressu stúlkur stóðu fyrir fjáröflunarkvöldi fyrir forsetaframboð Jón Örvars til Hagsmunaráðs í gærkvöld. Einstaklega vel þótti til takast og nemur nú kosningasjóður Jóns tugum milljarða. Opinber styrktaraðili framboðsins er bólivíska mjólkursamsalan, en Jón er velþekkt poppstjarna í Bólivíu, eftir að hafa lent í öðru sæti í "El Ídolo Boliviano".

Jón Örvar (eða El Rey del Pop, eins og hann er kallaður) gat því miður ekki mætt sjálfur, þar sem hann hafði verið boðaður á neyðarfund Sameinuðu Þjóðanna, en hann kvaðst að vonum sáttur með fjáröflunina.

"Baráttan er rétt að hefjast" var haft eftir honum í morgun, en hann vaknar kl. 5:30 á hverjum morgni til að sinna sjálfboðastarfi á elliheimili. "Það er svo margt í þessu þjóðfélagi sem betur mætti fara. Ég er bara auðmjúkur þjónn samvisku minnar, en ég veit að með samstilltu átaki getum við breytt samfélaginu til hins betra". Á elliheimilinu sinnir hann aldraðri fóstru sinni, Aðalbjörgu Kristjánsdóttur, fyrrum grunnskólakennara. " Ó Jónsi minn, þú ert ljós lífs míns. Án þín væru ævikvöld okkar svo mun dimmri. Þú ert kærleikurinn holdi klæddur, elsku engillinn minn."
Til gamans má geta að enginn hefur látist eftir að Jón Örvar hóf störf þarna.

Settu X við Jón Örvar